ម៉ារ៉ុក៖ រដ្ឋមន្ត្រីការបទេសម៉ារ៉ុក លោក Nasser BOURTITA បានរម្លឹកជាថ្មីថាប្រទេសម៉ារ៉ុកគាំទ្រប្រទេសកម្ពុជាធ្វើជាសមាជិកអង្កេតការណ៍នៃអង្គការសហប្រតិបត្តិការឥស្លាម (OIC)។ ប្រសិនជាកម្ពុជាក្លាយជាសមាជិកអង្គេតការណ៍មែននោះកម្ពុជានឹងក្លាយជាប្រទេសដែលមិនកាន់សាសនាឥស្លាមទី៣ ហើយដែលក្លាយជាសមាជិកអង្កេតការណ៍នៃអង្គការនេះ។
ក្នុងសេចក្ដីប្រកាសព័ត៌មានរួមរវាងរដ្ឋមន្ត្រីការបរទេសកម្ពុជា និងម៉ារ៉ុក រដ្ឋមន្ត្រីនៃប្រទេសទាំងពីរបានប្រកាសពីចំណងទំនាក់ទំនងដ៏រឹងមាំ និងគាំទ្រគ្នាទៅវិញទៅមកទាំងទ្វេរភាគី និងនៅលើឆាកអន្តរជាតិផងដែរ។
ក្នុងជំនួបនោះលោក Nasser BOURTITA បានរម្លឹកជាថ្មីពីការគាំទ្រកម្ពុជាធ្វើជាសមាជិកអង្កេតការណ៍អង្គការសហប្រតិបត្តិការឥស្លាម (OIC) និងគាំទ្រកម្ពុជាក្នុងក្របខណ្ឌអង្គការអន្តរជាតិផ្សេងទៀតផងដែរ។
នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានប្រកាសកាលពីខែឧសភា ឆ្នាំ២០១៩ ថាការក្លាយជាសមាជិកអង្គេតការណ៍អង្គការសហប្រតិបត្តិការណ៍ឥស្លាមនឹងជំរុញទំនាក់ទំនាងកាន់តែជិតស្និតជាមួយនឹងសមាជិកអង្គការនេះដែលនឹងជួយរួមចំណែកដល់ការអភិវឌ្ឍន៍កម្ពុជា។
គួរឱ្យដឹងផងដែរថាអង្គការ OIC មានសមាជិកជាប្រទេសឥស្លាមទាំងអស់ ៥៧ប្រទេស ក្នុងនោះប្រទេសក៏មានប្រទេសក្នុងតំបន់អាស៊ាន២ គឺឥណ្ឌូនេស៊ី និងម៉ាឡេស៊ីផងដែរ។ ខណៈមានតែប្រទេស ២ប៉ុណ្ណោះដែលមិនមែនជាប្រទេសឥស្លាមតែត្រូវបានអនុញ្ញាតឱ្យក្លាយជាសមាជិកអង្កេតការណ៍នោះគឺប្រទេសរុស្ស៊ី និងប្រទេសថៃ៕
